მე ვარ ლიკა ჯინაშვილი, დედოფლისწყაროდან. ვარ 15 წლის და ვსწავლობ ხორნაბუჯის საჯარო სკოლაში მე-10 კლასში.
მე განსაკუთრებული ინტერესი მაქვს ხელოვნების, დიზაინისა და ტექნოლოგიების მიმართ. მიყვარს ხატვა, ქსოვა, კერამიკა, და ვებგვერდებისა თუ პოსტერების შექმნა. ამ მრავალფეროვან აქტივობებში ვპოულობ ჩემთვის მნიშვნელოვან შემოქმედებით თავისუფლებას, რაც საშუალებას მაძლევს, გამოვხატო ჩემი გრძნობები და იდეები.
მოხალისეობა ჩემს ცხოვრებაში განსაკუთრებულ ადგილს იკავებს, რადგან ვფიქრობ, რომ იგი განვითარების, ახლის შეცნობისა და საზოგადოებისათვის მნიშვნელოვანი წვლილის შეტანის საუკეთესო საშუალებაა. მოხალისეობასთან ერთად, ასევე ვარ სკოლის თვითმმართველობის წევრი და სკოლის პრეზიდენტი, რაც დიდი პასუხისმგებლობაა და ერთადერთი შანსი, შევიტანო დადებითი ცვლილებები სკოლასა და საზოგადოებაში.
ჩემი მთავარი მიზანი ცხოვრებაში არის საკუთარი თავის სრულყოფა და საზოგადოებაზე პოზიტიური გავლენის მოხდენა. ვცდილობ, ვიყო მაგალითი სხვებისთვის და აქტიურად ვიმუშაო ჩემი ინტერესების სფეროში.
